བཙོན་ནས་སྲིང་ཆུང་གུ་རུ་སྐྱིད་ལ་སྤྲིངས་པའི་འཕྲིན་ལན། འོས་སྦྱོར།

སྙིང་བཏོན་ཏེ་གླེང་བ།

____ སྲིང་ཆུང་གུ་རུ་སྐྱིད་ལ་འཕྲིན་ལན་དུ།

                   ཐེའུ་རང་།

ཕན་ཚུན་ངོ་མ་ཐུག་ལ་སྐད་མ་གོ་བར་ལོ་ངོ་ཧྲིལ་པོ་གཅིག་ལྷག་འགོར་བའི་དེ་རིང་། ཁྲི་མུན་བཙོན་གྱི་འོབས་སུ་ཁྱོད་ཀྱིས་བསྐུར་བའི་འཕྲིན་དང་འདྲ་པར་འབྱོར་བར་དགའ་བ་སྨྲ་མི་ཤེས་པ་སྐྱེས་བྱུང་། གནམ་ས་གུ་དོག་པ། གདུག་པ་ཆེ་བ། མུན་པ་འཐིབ་པ་འདི་རུ་ཕ་སྐད་ཀྱི་འཕྲིན་དང་དཔེ་ཆ་འབྱོར་རྒྱུ་ནི་མཁའ་ཡི་མེ་ཏོག་ལྟ་བུར་ཆགས་ཡོད་ལ།འཕྲིན་ཕར་སྐུར་ཚུར་འོང་ལ་ཀླད་ནས་ལྟ་རྟོག་དང་ཞིབ་བཤེར་ཞེ་དྲག་ནན་མོ་བརྒྱུད་དགོས་པས།ནང་གི་དེ་ཉིད་མངོན་པར་མཚོན་པའི་སེམས་ཀྱི་གདངས་ཤིག་ནམ་ཡང་འདོན་ཐབས་དཀའ།འདི་ནི་བཤད་མི་ཤེེས་པའི་སྡུག་བསྔལ་ཅིག་རེད་ཨང་།ཀླད་ལ་དེའི་སྐོར་ནས་ཡོད་འོས་པའི་ཐོབ་ཐང་དང་རང་དབང་།གནས་ལུགས་རྒྱུ་མཚན་ལ་དྲངས་ནས་ཁ་གསལ་གཏིང་གསལ་གྱིས་ཡང་དང་ཡང་དུ་བཤད་ནའང་།དེ་དག་གི་དེ་དག་ཁབ་ཆག་ས་འོག་ལས་མ་འདས།