ཨ་བུའི་སེམས་པ་དབེན་རི་ལ་ཤོར་སོང་།
རྫ་དཔལ་སྤྲུལ།
འཇིག་རྟེན་འཁྲུལ་སྣང་འཁོར་བ་ཡི་གྲོང་ན། །
ཟིན་དུས་མེད་པའི་བྱ་བྱེད་ཀྱི་རྣམ་གྲངས། །
དགོས་འབྲས་མེད་པའི་མགོ་སྐོར་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
ཡུལ་དགོན་འབྲེལ་བའི་དགེ་འདུན་གྱི་སྡེ་ན། །
སྙིང་བོ་མེད་པའི་རྣམ་གཡེང་གི་འདུ་ཡོང་། །
བྱ་བྱེད་བྲེལ་དོའི་ལས་ཀ་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
སུ་ལ་བལྟས་ཀྱང་འཆི་ལ་ནི་ཁད་ཁད། །
གང་ལ་བསམས་ཀྱང་འཆི་མེད་ཀྱི་རྟག་རྩིས། །
ཡི་མུག་སྐྱེ་བའི་ཤོམ་ར་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
སུ་དང་འགྲོགས་ཀྱང་ཆགས་སྡང་གི་སྣོན་མ། །
གང་དང་འབྲེལ་ཀྱང་གཡོ་སྒྱུ་ཡི་མགོ་བསྐོར། །
དགེ་རྐྱེན་མེད་པའི་གྲོགས་མང་འདི་མཐོང་ནས། །
ཨ་བུའི་སེམས་པ་དབེན་རི་ལ་ཤོར་སོང་། །
ཉོན་མོངས་དགྲ་འདིས་ཁམས་གསུམ་ཀུན་བསླུས་བསླུས། །
རྣམ་གཡེང་འཁོར་ལོ་རིགས་དྲུག་འདིས་བསྐོར་བསྐོར། །
སྡུག་བསྔལ་བསྐྱེད་པའི་ལས་ཐབས་འདི་མཐོང་ནས།།
ཨ་བུའི་སེམས་པ་དབེན་རི་ལ་ཤོར་སོང་། །
བསླུ་མེད་མགོན་པོ་བླ་མ་དང་དཀོན་མཆོག །
དབེན་པར་བསླེབས་ནས་དབེན་གནས་སུ་སྲན་ཚུགས། །
གནས་ལ་བརྟེན་ནས་ལུས་དབེན་དང་ངག་དབེན། །
དེ་ལ་བརྟེན་ནས་སེམས་དབེན་ཀྱང་སྐྱེ་བས། །
དབེན་རི་ཟིན་པའི་བྱིན་རླབས་ཤིག་གནང་ཤོག །
