ཞོགས་ལྗང་ལ་ཁྲིམས་ཐག་བཅད་ཅིང་སླར་ཡང་ཞུ་གཏུག

༄༅། །བོད་ཀྱི་རྩོམ་པ་པོ་དང་མང་གཙོ་དོན་གཉེར་བ་ཞོགས་ལྗང་ལགས་ཀྱི་དངོས་མིང་ལ་འབྲུག་དཀར་རྒྱལ་ལམ་འབྲུག་ལོ་ཟེར་བ་དང་།

ཕྱི་ལོ་ ༡༩༨༤ ལོར་སྐྱེས་ཤིང་ད་ལྟ་རང་ལོ་ ༣༢ ཡིན་འདུག ཁོང་གི་ཕ་ཡུལ་ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང་རྒན་རྒྱ་ཡུལ་ཚོ་ཁ་གྱ་སྡེ་བ་ཡིན་ཞིང་། ཁོང་གི་ཕ་ཚབ་ཀྱི་མིང་ལ་རྟ་མགྲིན་དང་མ་མིང་ལ་ལྷ་མོ་སྐྱིད་ཟེར་གྱི་ཡོད་འདུག ཁོ་རང་སློབ་ཆེན་ཐོན་རྗེས་ཤེས་ཡོན་གྱི་ལས་ཀ་ཙག་ཙིག་རེ་བྱས་ཏེ་རང་འཚོ་བྱས་ཡོད་པ་དང་། ད་ལྟ་ཁོ་རང་གི་ནང་དུ་སྐྱེས་དམན་དང་ཕྲུ་གུ་ལོ་ན་ ༤ ལ་སོན་མ་ཐག་པའི་ཕྲུ་གུ་གཅིག་ཡོད་ཅིང་དེའི་མིང་ལ་‘རང་དབང་ལ་དགའ་བ་’ཞེས་བཏགས་ཡོད་འདུག

ཁོང་ནུབ་བྱང་མི་རིགས་སློབ་ཆེན་ནས་ཐོན་སྐབས། སྲིད་གཞུང་གིས་མཐར་ཕྱིན་རྒྱུགས་འགྲན་ནང་ཞུགས་བཅུག་མེད་པ་མ་ཟད། དུས་རྒྱུན་ཁོ་རང་གི་འགུལ་སྐྱོད་ལ་ལྟ་རྟོག་བྱེད་པ་དང་། ལས་ཀའི་ཐད་དུའང་དཀའ་རྙོག་མང་པོ་བཟོས་ཡོད་འདུག ཞོགས་ལྗང་གིས་དེ་སྔ་བོད་དོན་དང་འབྲེལ་བའི་རྩོམ་ཡིག་མང་པོ་སྤེལ་མྱོང་ཞིང་། རྒྱ་རིགས་དམངས་གཙོ་དོན་གཉེར་བ་ཝང་ལི་ཞོན་དང་ཡུ་ཅེ་སོགས་ཀྱི་རྩོམ་ཡིག་མང་པོ་བོད་བསྒྱུར་ཡོད་པ་དང་།ཁོང་གིས་དེ་སྔ་ <<ལམ་གྱི་སྙིང་སྟོབས་>> ཞེས་པ་ཞིག་བྲིས་པ་དེ་རྒྱ་ནག་གིས་བཀག་སྡོམ་སྒོས་གཞུང་བཞེས་བཏང་ཡོད་པ་དང་། དེ་ལས་གཞན་ <<རང་གྲོལ་སྙིང་སྟོབས་>> དང་། <<རང་དབང་གི་ཆེད་དུ། ང་ལ་བློ་འགྱོད་མེད།>> <<སྙུ་གུའི་སྟོབས་>>ཅེས་པའི་དེབ་ ༤ ཙམ་དཔར་སྐྲུན་ཞུས་ཡོད་པ་རེད།

ཕྱི་ལོ་ ༢༠༠༨ ལོར་བོད་ནང་ས་བྱིའི་ཞི་རྒོལ་བྱུང་སྐབས་ཞོགས་ལྗང་ཁོང་ནུབ་བྱང་མི་རིགས་སློབ་ཆེན་གྱི་དངོས་གཞིའི་སློབ་མ་ཡིན་ཞིང་། སྐབས་དེར་ཁོང་དང་ཐེའུ་རིང་ངམ་བཀྲ་ཤིས་རབ་བརྟན་སོགས་ཀྱིས་སྣེ་ཁྲིད་དེ་ནུབ་བྱང་མི་རིགས་སློབ་ཆེན་གྱི་སློབ་མ་ཚོས་ལག་ཏུ་“བོད་མིའི་སྐྱིད་སྡུག་མཉམ་”མྱོང་ཞེས་འཁོད་པའི་འཕྲེད་དར་བཟུང་སྟེ། སློབ་གྲྭའི་ནང་ཞི་བའི་རྔམ་སྟོན་སྐོར་སྐྱོད་དང་དགོང་མོར་སློབ་གྲྭའི་ཐང་ཆེན་དུ་མྱ་ངན་གྱི་མར་མེ་སྒྲོན་པ་སོགས་གནང་ཡོད་སྟབས། ཕྱི་ལོ་ ༢༠༡༠ ཟླ་ ༤ ཚེས་ ༦ ཉིན་ (སྤྱི་ཟླ་ལྔ་པའི་ཚེས་བཅུ་) རྒྱ་ནག་གི་ཉེན་རྟོག་པས་ཞོགས་ལྗང་དང་ཐེའུ་རིང་གཉིས་ནུབ་བྱང་མི་རིགས་སློབ་ཆེན་ནས་འཛིན་བཟུང་ཐེངས་དང་པོ་བྱས་ཏེ། ཞོགས་ལྗང་ལ་ཕྱི་ཕྱོགས་ཀྱི་གཞོན་ནུ་ཚོགས་པ་དང་བླ་མ་ཤིང་བཟའ་ཚང་སོགས་ལ་འབྲེལ་བ་ཡོད་པའི་ཉེས་འཛུགས་བྱས་ཏེ། ལན་ཀྲུའུ་ཁྲིམས་ཁང་ཞིག་ནས་ཟླ་གཅིག་དང་ཉིན་གཉིས་རིང་ཞི་དྲག་གཉིས་ཐོག་ནས་འདྲི་རྩད་བཀག་བསྐྱིལ་བྱས་མཐར་ཀློད་གྲོལ་བཏང་།

ཕྱི་ལོ་ ༢༠༡༢ ཟླ་ ༢ ཚེས་ ༩ ཉིན་ཞོགས་ལྗང་ལགས་ཀྱིས་རྒྱའི་བཙོན་འོག་ཏུ་ཡོད་པའི་ཁོ་རང་གི་གྲོགས་པོ་ཐེའུ་རང་ལ་འཕྲིན་ཞིག་ཅིག་བསྐུར་ཡོད་པའི་ནང་འདི་ལྟར་བཀོད་འདུག “གྲོགས་པོ་ལགས། སྤྱིར་རང་ཅག་གི་འཕྲིན་ཡིག་འབྲི་ཚུལ་ལྟར་ན། ཐོག་མར་ཁམས་བདེ་ལྟ་བུའི་ཁ་ཡག་ཅིག་བཤད་དགོས་པར་འདུག་མོད། གཅིག་ན་ཁོ་བོ་དགོས་མེད་མཁྲེགས་འཛིན་གྱི་གནས་ལ་གོམས་ལོབས་དཀའ་བས་འབྲི་སྟངས་དེར་སྣང་མེད་བྱས་པ་དང་། གཉིས་སུ། སྡོད་གནས་དེ་ལྟ་བུ་ཞིག་ཏུ་ལུས་ཁམས་བདེ་མོ་ཞིག་ཁྱོན་ནས་མི་ཡོང་བ་ཐག་གིས་ཆོད་པས། མགོ་དེ་ལྟར་བཟུང་བ་ལ་དགོངས་འགལ་མེད་པར་ཞུ།

དེ་ཡི་ཚབ་ཏུ་ང་རང་གི་གནས་ཚུལ་རགས་ཙམ་ཞིག་གྲོགས་ལ་ཞུ་འདོད། འདིས་ཀྱང་གྲོགས་ཀྱི་སྐུ་ཁམས་བག་ཙམ་གསོ་ཐུབ་པའི་སྨོན་ལམ་ཡང་ཡང་འདེབས། དེ་ཡང་། ཉིས་སྟོང་བཅུ་ལོའི་སྤྱི་ཟླ་ལྔ་པའི་ཚེས་བཅུ་ཉིན་ཏེ། ང་རང་གཉིས་བཀག་ཉར་བྱས་པའི་རྗེས་ཀྱི་ཟླ་གཅིག་ལྷག་གི་རྗེས་སུ་ང་རང་གློད་གྲོལ་བཏང་བ་དང་། ཉིན་དེར་སློབ་གྲྭ་དང་བདེ་འཇགས་ལས་ཁུངས་གཉིས་མཉམ་འབྲེལ་སྒོས་རླངས་འཁོར་ས་ཚིགས་སུ་བསྐྱལ་ཞིང་རླངས་འཁོར་ལ་བཅུག་སྟེ་ཕ་ཡུལ་དུ་མངགས་བྱུང་། ཕ་ཡུལ་ནས་ཡུན་རིང་མ་བསྡད་པར་ཟི་ལིང་དུ་ཆས་པ་ཡིན། སྤྱིར་ན་ཟི་ལིང་ནས་ཡུན་རིང་འདུག་པའི་འཆར་གཞི་དེ་ཐོག་མར་མེད་ན་ཡང་། ས་དེར་སླེབས་རྗེས་གྲོགས་པོ་དག་དང་ཡར་བཤད་མར་བཤད་ཀྱིས་རྗེས་སུ་དེ་ནས་འདུག་པའི་ཐག་བཅད་པ་ཡིན། ཟླ་གཅིག་ཙམ་ལ་དེ་ནས་གླ་བྱས་རྗེས། གྲོགས་གདོན་དང་མཉམ་དུ་དཔེ་གཟིགས་ཁང་ཞིག་གི་སྒོ་ཕྱེས་ན་ཡང་། བར་ཆད་བདུད་ཀྱི་རླུང་འཚུབ་དུས་མིན་དུ་ལྡང་བས། ཟླ་ངོ་འགའ་ལས་ཚོང་གཉེར་བྱེད་མ་ཐུབ་པར་གཞན་ལ་བཙོངས་བཞག རྗེས་སུ་ངེད་གཉིས་ཀྱང་རང་རང་སར་མི་འགྲོ་ཀ་མེད་བྱུང་སོང་། ཁོ་རང་པེ་ཅིང་དུ་སོང་ནས་གློག་ཀླད་སློབ་སྦྱོང་བྱས་པ་དང་། ང་རང་ཕྱིར་བླ་བྲང་དུ་ལོག་སྟེ་ཟླ་གཅིག་ལྷག་བསྡད་རྗེས་ཁྲི་ཀ་རྫོང་དུ་སོང་ནས་བྱ་བ་གཉེར་བ་ཡིན། ཁྲི་ཀ་ནས་ངའི་ལས་ཐོབ་ནི་དྲུང་ཡིག་ཡིན་མོད། ལས་ཀ་གཙོ་བོ་ལས་ཁུངས་ཀྱི་རྩོམ་སྒྲིག་པ་ལྟ་བུ་ཞིག་ཏུ་ཆགས་ཡོད། གཞན་དང་བསྡུར་ན་སྒེར་གཉེར་ལས་ཁུངས་དེ་ནས་གླ་ཕོགས་ཀྱང་ཚོད་ཙམ་སྟེ། ཟླ་གཅིག་ལ་སྒོར་སུམ་སྟོང་རེད། ཉལ་ཁང་དང་ཟ་མ་ཚང་མ་གཞུང་ནས་རེད། ཡིན་ན་ཡང་། དཀའ་ལས་ཅུང་ཙམ་ཡོད་པ་ནི་རང་གི་ལས་རིགས་དང་མི་འཕྲོད་པ་དེ་རེད། དུས་ཚོད་ཚང་མ་གཞུང་ལས་ལ་བཀོལ་དགོས་པས་རང་དབང་གི་དཔེ་ཀློག་དུས་ཚོད་ཞེ་དྲག་ཐུང་། ནམ་རྒྱུན་ལས་མཚམས་བཞག་སྟེ་ངལ་གསོ་བྱེད་པའི་དུས་ཚོད་ནི་དགོང་མོ་ཁོ་ན་ལས་མི་འདུག་པས། མ་མཐའ་ཡང་དགོང་མོའི་ཆུ་ཚོད་གཉིས་གསུམ་དབར་དུ་དཔེ་ཀློག་བྱེད་དགོས་འདུག དེ་ལྟར་བྱས་ན་སང་ཉིན་ལུས་ཡོངས་ཐང་ཆད་པས། གཞུང་ལས་ཕར་ཞོག ཐ་ན་རང་གི་བདེ་ཐང་དང་དཔེ་ཀློག་ལ་ཡང་དཀའ་ཁག་ཆེན་པོ་འདུག ཡིན་ན་ཡང་། དེ་ལྟར་རྒྱུན་འཁྱོངས་བྱས་ཏེ་ཟླ་ངོ་ཁ་ཤས་བུད་སོང་། ཟླ་ངོ་འགའི་རྗེས་སུ་སི་ཁྲོན་ཕྱོགས་ནས་རང་ལུས་མེར་བསྲེགས་ཀྱི་སྦྱོར་བ་རླབས་པོ་ཆེ་གཅིག་རྗེས་གཉིས་མཐུད་དུ་བྱུང་བར་མ་ཟད། རྒྱུ་རྐྱེན་ཅི་ཡིན་ལ་གསལ་ཁ་ཆེན་པོ་མེད་པར་ལན་དྲུག་ནས་སྐུ་ཞབས་མེ་ལྕེ་ལགས་ཀྱང་བཀག་ཉར་བྱས་པ་རེད། རྒྱུ་མཚན་དང་གནས་ལུགས་འདྲེན་རྒྱུ་མེད་པར་ཁྱིམ་མི་དག་ལ་དཀའ་ལས་གཏད་མཐར། ངས་ཀྱང་ལས་མཚམས་བཞག་སྟེ་ཕྱིར་ཡུལ་དུ་མི་ལོག་ཐབས་མེད་བྱུང་སོང་། ཅུང་ཙམ་ལྷོད་ལ་བབས་རྗེས། ཡང་བསྐྱར་ཟི་ལིང་ཕྱོགས་སུ་གོམས་ཁ་བསྒྱུར་ཅིང་། དེ་ནས་ཟླ་ཕྱེད་ལྷག་ལ་བསྡད་དེ་ངའི་དཔེ་དེབ་<<སྙུ་གུའི་སྟོབས>> ཞེས་པ་པར་སྐྲུན་བྱས་པ་ཡིན། ཐོག་མའི་འཆར་གཞི་ལྟར་ན་དཔེ་དེབ་དེ་ཡང་ཅུང་རྩུབ་དྲག་ཅན་ཞིག་ཕུད་རྩིས་ཡིན་མོད། གྲོགས་པོ་དག་གི་བསམ་འཆར་དང་ཁ་བརྡ་ལ་ཉན་རྗེས། མཐར་ཞི་འཇམ་སྒོས་དཔར་ཟིན། འདི་ནི་ང་ལ་མཚོན་ན་དགའ་སྐྱོ་གཉིས་ལྡན་གྱི་བྱ་བ་ཞིག་ཡིན། དཔེ་དེབ་ལ་ཚད་ལྡན་གྱི་དཔེ་རྟགས་ཤིག་མེད་ན་ཡང་། གནས་སྐབས་སུ་གྲགས་འགུལ་ཆེན་པོ་མི་འདུག

སྤྱིར་ན། ད་ལོ་སི་ཁྲོན་ཕྱོགས་སུ་འགྲོ་རྩིས་ཡིན་རུང་། ཉེ་སྔོན་གནས་ཚུལ་ཛ་དྲག་ཆེ་བས་འགྲོ་ཐབས་མ་བྱུང་། དེ་ཡང་རྒྱལ་ལོའི་ཚེས་གཅིག་ཉིན་བྲག་མགོ་ནས་འོས་ལངས་བྱས་ཏེ་མི་མགོ་གཉིས་ཀྱི་ཚེ་སྲོག་ཤོར་བ་དང་། མི་མང་བོ་ཞིག་འཛིན་བཟུང་ཐེབས་འདུག་སྐད། རྗེས་སུ་ཛམ་ཐང་ཕྱོགས་ནས་མང་ཚོགས་དང་དམག་མིའི་བར་དུ་འཐབ་འཛིང་བྱུང་སྟེ། དམག་མིས་མང་ཚོགས་ལ་མེ་མདའ་བརྒྱབ་པ་སོགས་ཀྱི་དོན་རྐྱེན་བྱུང་བར་མ་ཟད། སྤྱི་རྩིས་ཀྱི་ཟླ་གཉིས་པའི་ཚེས་གསུམ་ཉིན་དཀར་མཛེས་ཕྱོགས་ནས་མི་སྐྱ་གསུམ་གྱིས་རང་ལུས་སྦྱིན་སྲེག་བཏང་བ་སོགས་ཀྱི་གནས་ཚུལ་འདུག་མོད། ཞིབ་ཕྲའི་གནས་ཚུལ་ཞིག་ད་ལན་རྩད་ཆོད་མ་བྱུང་། གང་ལྟར། བོད་ཡུལ་ལུང་བ་སོ་སོ་ནས་འོས་ལངས་ཀྱི་རྒྱུན་ཆད་ཀྱིན་མེད་པར་མ་ཟད། དཔའ་བོ་དཔའ་མོ་ཉི་ཤུ་ལྷག་གིས་རང་ལུས་སྦྱིན་སྲེག་བཏང་བ་ནི་ཅི་ནས་ཀྱང་བཟོད་ཐབས་མེད་པའི་གནས་སུ་འདུག གལ་ཏེ། སྐབས་འདིར་གྲོགས་པོ་ཁྱོད་ཉིད་རང་གི་ཕ་ཡུལ་དུ་ཡོད་པའི་དབང་དུ་བཏང་ན་ཅི་བྱ་མི་ཤེས་མོད། ང་ལ་མཚོན་ན་དེ་དག་གི་ཆེད་དུ་བདེན་པའི་སྐད་ཆ་ཚིག་གཅིག་ཀྱང་བཤད་མ་སྤོབས་པར་ལུས་ཡོད་པས། གྲོགས་པོས་ལེ་བདའ་དང་ངོ་མཚང་ཇི་ལྟར་བྲུས་ཀྱང་དགའ་བ་ལས་མེད། གཞན་ཡང་། ད་ལན་གསེར་རྟ་ནས་རྒྱ་མིའི་དམག་དཔོན་ཞིག་དམངས་དམག་གིས་འཛིན་བཟུང་བྱས་ཏེ་ཉིན་གཉིས་ལྷག་ལ་བཀག་ཉར་གྱིས་བཟུང་སོང་བའི་མང་ཚོགས་དང་བསྲེགས་ཟིན་པའི་བེམ་པོ་སྤྲོད་པའི་མི་གཏའ་བྱས་པར་འདུག་ན་ཡང་། མཐར་རྒྱ་བླ་ཞིག་གིས་མང་ཚོགས་ཀྱི་མགོ་བསྐོར་ཏེ་ཕྱིར་སྤྲད་པ་དང་། མང་ཚོགས་ལ་ལག་ཡོང་ཅི་ཡང་མ་སྤྲད་སྐད། ད་དུང་། ཛམ་ཐང་ནས་མང་ཚོགས་དང་དམག་མིའི་དབར་དུ་འཐབ་འཛིང་ཤོར་རྐྱེན་ནི། དམག་མིས་བོད་མི་དཔའ་བོ་ཞིག་འཛིན་བཟུང་བྱེད་པར་གྲབས་གཤོམ་དུས་མང་ཚོགས་ཀྱིས་བཀག་འགོག་བྱས་པ་ཡིན་འདུག དེ་ལྟའི་དགའ་བྲོད་ཀྱི་མཐུན་སྒྲིལ་ཡང་བོད་ན་འདུག་པས་གྲོགས་ལ་ཟུར་ཙམ་ཞུས་པ་ཡིན།” ཞེས་སོགས་བཀོད་པ་དང་། ཁོང་གིས་གྲོགས་ཐེའུ་རིང་ལ་སྔ་ཕྱི་ར་འཕྲིན་ཡིག་ཐེངས་གསུམ་ལ་བཏང་ཡོད་པ་དག་གིས་བོད་ནང་གི་གཞོན་སྐྱེས་རྩོམ་པ་པོའི་སྡེ་ལ་ཚོར་ཤུགས་ཆེན་པོ་བསླངས་ཡོད་འདུག

ཕྱི་ལོ་ ༢༠༡༥ ཟླ་ ༣ ཚེས་ ༡༩ ཉིན་རྩོམ་པ་པོ་ཞོགས་ལྗང་དང་ཁོ་ཚང་གི་མག་པ་གཉིས་མཚོ་སྔོན་རེབ་གོང་འགྲོ་སྐབས་རྒྱ་ནག་གི་ཉེན་རྟོག་པས་བཙན་ཁྲིད་ཐེངས་གཉིས་པ་བྱས་ཤིང་ཉེས་འགེལ་ཅི་བྱས་མི་གསལ་ནའང་། ཁོ་རང་བཀག་བསྐྱིལ་བྱས་པ་དང་མག་པ་གློད་གྲོལ་བཏང་། ཁོ་རང་གི་གྲོགས་པོ་ཚོས་ཞོགས་ལྗང་གིས་དེ་སྔོན་འགྲོ་བ་མིའི་ཐོབ་ཐང་དང་དམངས་གཙོ། རང་དབང་སོགས་ཀྱི་སྐོར་ནས་རྩོམ་ཡིག་མང་པོ་སྤེལ་བ་དང་། ལྷག་པར་དུ་ཁོ་རང་གི་ཟིན་བྲིས་ནང་བོད་པའི་ས་གནས་ཁ་ཤས་ནང་སྐོར་སྐྱོད་གནང་བའི་མཐོང་ཐོས་སེམས་ཚོར་དང་སྦྲགས་ནས་བྲིས་ཡོད་སྟབས། རྒྱ་གཞུང་གིས་དེ་དག་ཆབ་སྲིད་ལ་འགལ་བར་ངོས་འཛིན་བྱས་པ་ཡིན་པའི་ཚོད་དཔག་བྱས་ཡོད་འདུག

ཕྱི་ལོ་ ༢༠༡༥ ཟླ་ ༣ ཚེས་ ༡༦ ཉིན་ཁོས་རང་གི་མཐའ་མཇུག་གི་ཟིན་ཐོ་གཉིས་པ་སྤེལ་བའི་ནང་། “རེབ་གོང་ནས་མེ་མདའ་བཟུང་བའི་དམག་མི་སྐོར་དང་སྐོར་བྱས་ནས་མང་ཚོགས་དག་ལ་སྔོག་བཤེར་བྱེད་ཀྱི་འདུག འདི་ནི་མང་ཚོགས་སྤྱི་བའི་བདེ་འཇགས་ལ་སྲུང་སྐྱོབ་བྱས་པ་ཡིན་ནམ། བསམ་བཞིན་དུ་དམངས་སེམས་ལ་ཟིང་ཆ་བསླངས་པ་ཡིན་ནམ། སྤྱི་ཚོགས་བརྟན་བརླིང་ཟེར་བ་ནི་འདི་ལྟའི་བྱེད་ལས་ཤིག་ཡིན་ཚེ་ཤིན་ཏུ་འཇིགས་སུ་རུང་བ་ལ། མང་ཚོགས་ཀྱི་སྟེང་དུ་མེ་མདའ་བཟུང་བའི་ཉེན་རྟོག་པ་འདི་དག་ནི་སུ་ཞིག་གི་ལག་ཆ་ཡིན་ནམ། ཁོ་ཚོས་ཅིའི་ཕྱིར་འདི་ལྟར་བྱེད་དགོས་པ་ཡིན་ནམ། ང་ཚོའི་འགྲོ་བ་མིའི་ཐོབ་ཐང་ཟེར་བ་ནི་འདི་ལྟར་འགན་སྲུང་བྱས་པ་ཡིན་ནམ། ཁྲིམས་སྐྱོང་རྒྱལ་ཁབ་ཅེས་པ་ནི་འདི་ལྟ་བུ་ཞིག་ཡིན་ནམ། བསམས་ཤིང་བསམ་ན་འཇིགས་དངངས་སྐྱེས་པའི་བྱེད་ལས་འདི་དག་ནི་ཟིང་འཁྲུག་གི་རྒྱུ་འབའ་ཞིག་ལས་མ་འདས་སོ།།”ཞེས་བཀོད་འདུག

ཕྱི་ལོ་ ༢༠༡༦ ལོའི་ཕྱི་ཟླ་ ༢ ཚེས་ ༡༥ ཉིན་ཐུན་རིན་རྫོང་ཁྲིམས་ཁང་གིས་ཞོགས་ལྗང་གི་ནང་མིར་བརྡ་ལན་འབྱོར་ཏེ་རྩོམ་པ་པོ་ཞོགས་ལྗང་ལ་ཚེས་ ༡༧ ཉིན་ཁྲིམས་ཐག་གཅོད་རྒྱུ་ཡིན་ལུགས་བརྗོད་ཡོད་པ་དང་། ཁོང་གི་ནང་མི་གཉེན་འབྲེལ་དང་ཚོ་བའི་མི་སྣ་སོགས་མི་གྲངས་ ༤༠ ལྷག་རེབ་གོང་དུ་ཕྱིན་སྐབས། ཁྲིམས་རྩོད་སོགས་ཀྱི་གོ་རིམ་གང་ཡང་མེད་པར་ཁྲིམས་དཔོན་ཞིག་གིས་ཞོགས་ལྗང་གིས་ཕྱི་ལོ་ ༢༠༠༨ ལོར་མི་རིགས་ཁ་བྲལ་གྱི་ཟིང་ཆ་བསླངས་པ་དང་། ཕྱི་གྱར་ཁ་བྲལ་བར་ལྐོག་འབྲེལ་བྱས་ པ། ཆ་འཕྲིན་བརྒྱུད་ལམ་ཁག་ཏུ་ཐེངས་མང་པོར་སྤྱི་ཚོགས་བརྟན་བརླིང་ལ་གནོད་པའི་བརྗོད་བྱའི་རྩོམ་ཡིག་སྤེལ་བ་སོགས་ནག་ཉེས་ ༤ བགྲང་སྟེ་ལོ་ ༣ གྱི་ཁྲིམས་ཐག་བཅད་པ་ཡིན་སྐོར་བསྒྲགས་ཡོད་འདུག ལོ་ན་བཞི་ལ་སོན་མ་ཐག་པའི་ཁོང་གི་ཕྲུ་གུར་སྐར་མ་ ༤ ཡི་རིང་ཐུག་ཏུ་བཅུག་རྗེས་ཕྱིར་ཁྲིད་ཡོད་འདུག ནང་མི་ཚོར་སྔོན་ཆད་ཟ་མ་དང་གྱོན་ཆས་སོགས་སྤྲོད་དུ་འཇུག་གི་ཡོད་ཀྱང་སྔར་ལོའི་ཕྱི་ཟླ་ ༡༢ པའི་ཚེས་མགོ་ཞིག་ནས་ཅ་དངོས་གང་ཡང་སྤྲོད་དུ་བཅུག་མི་འདུག

མཇུག་ཏུ། ཁྲིམས་དཔོན་གྱིས་ཉིན་ ༡༠ ནང་ཚུད་ལ་ཐེངས་འདིར་ཁྲིམས་ཐག་བཅད་པ་ངོས་ལེན་ཡོད་མེད་རང་ཐག་རང་གཅོད་བྱས་ཏེ་མཚན་རྟགས་འགོད་དགོས་པའི་འགེང་ཤོག་ཅིག་སྤྲད་ཡོད་པ་དང་། ཞོགས་ལྗང་གིས་སྐབས་དེ་ང་རང་གིས་བསྐྱར་དུ་ཞུ་གཏུག་བྱ་རྒྱུ་ཡིན་སྐོར་བརྗོད་དེ། ཕྱི་ཟླ་ ༢ ཚེས་ ༢༤ ཉིན་བོད་རྒྱའི་ཡིག་རིགས་གཉིས་ཐོག་ནས་ཤོག་ངོས་ ༡༧ ཅན་གྱི་གཏུག་བཤེར་ཡི་གེ་ཞིག་གོང་རིམ་ལ་ཕུལ་ཡོད་འདུག་པ་ལས་ད་ལྟའི་གནས་སྟངས་གསལ་བོར་ཤེས་ཀྱི་མེད་པ་བཅས།  

གོང་གཏུག་ཡི་གེ་འདི་ཕྱི་ཟླ་ ༤ ཚེས་ ༣ ཉིན་ལག་སོན་བྱུང་ཞིང་ཡར་འཇུག་བྱས།