ཡངས་མོའི་སྤང་གི་མ་ཏོག་ཆ།།
མཛའ་བརྩེའི་དབུ་ལྕང་མ་ཐུག་ལགས།།
ང་དང་ཆུང་གྲོགས་མཛའ་བོའི།།
བར་ཐག་རི་ཆུས་བཅད་ཡོད།།
ཡིད་སེམས་གཅིག་ལ་འདྲིས་ཡོད།།
ཕན་ཚུན་སྙིང་ནས་དྲན་ཡོད།།
སེམས་ལ་གས་ག་ཐེབས་འགྲོ།།
དགོང་སྔོན་དབྱིངས་ཀྱི་བྱེའུ་ཆུང་གཉིས།།
མཛའ་བརྩེའི་གཤོག་རྡང་མ་སྦྲེལ་ལགས།།
ང་དང་ཆུང་གྲོགས་མཛའ་བོའི།།
བར་ཐག་རི་ཆུས་བཅད་ཡོད།།
ཡིད་སེམས་གཅིག་ལ་འདྲིས་ཡོད།།
ཕན་ཚུན་སྙིང་ནས་དྲན་ཡོད།།
མིག་ལ་མཆི་མ་བསྐྱིལ་འགྲོ།།
སྡེ་ཆེན་གྲོང་གི་གཞོན་ནུ་ཟུང་།།
མཛའ་བརྩེའི་དཔུང་རྡང་མ་བསྒྲིག་ལགས།།
ང་དང་ཆུང་གྲོགས་མཛའ་བོའི།།
བར་ཐག་རི་ཆུས་བཅད་ཡོད།།
ཡིད་སེམས་གཅིག་ལ་འདྲིས་ཡོད།།
ཕན་ཚུན་སྙིང་ནས་དྲན་ཡོད།།
གཞས་ལ་སྐྱོ་བ་འདྲེས་འགྲོ།།
ཕྱི་ལོ་ ༢༠༡༣ ཕྱི་ཟླ་ ༡༢ ཚེས་ ༠༥ ཉིན་བྲིས་ཤིང་ཕྱི་ལོ་ ༢༠༡༧
ཕྱི་ཟླ་ ༠༧ ཚེས་ ༢༦ ཉིན་གྲུབ།
No comments:
Post a Comment